Mpont’ ‘o Vico Rutto a lu Mercato

quanno ‘o sole ‘e giugno ‘ e core scalfa

nascette int’ ‘a ‘na connola sfasciata

‘o figlio ‘e don Ciccillo d’Amalfi

Teneva allora poco chiù ‘e vint’anne

‘e carne brune, jonne ‘e mustaccielle

cappiello russo e povero int’ ‘e panne

faceva ‘o pisciaiuolo Masaniello

S’annammuraje ‘e ‘na figliola onesta

overo n’angiulillo ‘e Paraviso

mai ce sarranno belle comme a chesta

se ‘nzuraje cu Bernardina Pisa.

Vennemoncenne ‘o cunte d’’e peccate

‘e Masaniello che contrabbandiere

serveva ‘e nobile e malepavato

da duche cardinale e gabelliere

‘o prevete gnorsì duttore ‘e legge

Don Giulio Genoino se chiammava

pe’ tramente ‘o Viceré maneggia

cu Masaniello isso se ‘ncuntrava

S’anghieva ‘a capa ‘e mutte ‘o pisciaiuolo

forte era ‘a smania ‘e ascì da chell’inferno

‘a collera nun è p’’o Re sapgniuolo

Evviva ‘o Re! Abbasso ‘o malguverno!

Mo succerette ca nu bello juorno

‘o sette ‘e Luglio d’’o quarantasette

‘o pazzariello nuostro senza scuorno

pigliaje curaggio ‘a ‘a chiazza se ne jette

Fui ‘na tempesta ‘a posta d’’e gabelle

na furia scatenata d’aria nova

s’avventuraje cu ‘o popolo ribelle

‘a casa ‘o gabelliere a Portanova

Mumente ‘e gloria! Evviva Masaniello!

pecchè ‘a rivoluzione overo ha vinto

‘o Viceré levannese ‘o cappiello

cuncede ‘e privilegge ‘e Colaquinto

Aggiatece pacienza lorsignori

‘o fatto gruosso ancora adda succede

cedenno ‘o pisciaiuolo a troppi onori

‘e trappule spagnole nun ‘e vede

‘o Duca ‘e Maddaloni pavaje buone

p’accide a Masaniello cu crianza

‘o nomme d’o bandito era Perrone

ma rimanette ‘a capa ‘mpont’a lanza

Saglie ‘a paura e saglie ‘a freva ‘ncuollo

‘o duca ‘e Maddaloni s’ammutina

ma nu chianchiere stocca ‘o capocuollo

cu nu curtiello ‘o frato don Peppino

Cagnamme scena ‘a stu triatre ‘e sanghe

decettene ‘e spagniuole cu pacienza

pe nu pezzente asciute ‘a dint’’o fanghe

nun c’è bisogne ‘e tutta sta viulenza

Certi magnate ‘o vino corre a sciummo

‘e droghe chiù d’o lusso so’ ‘a minaccia

‘a cerevella mo s’è fatta ‘e chiummo

e ‘o popolo soje stesso ‘o sputa ‘nfaccia

Facenno lu discorso Masaniello

parlanno ‘a gente se spugliaje a nure

fujenno chiù s’annebbia ‘a cerevella

trasette ‘a Chiesa ‘o Carmine sicuro

‘o sparano cu cinche scuppettate

‘a capa muta int’a nu piatto ‘e argiento

‘o cuorpo ‘e chistu figlio disgraziato

jettato int’’a ‘na chiaveca fetente

Che sciorta Bernardina sposa amata

era ‘a Viceregina ‘e pupulane

mo dint’’o Borgo ‘e Sant’Antonio Abate

‘a vattene ‘e spagniuole e fa ‘a puttana

Chesta è ‘a vera storia toja oi Masaniè

e Napule ogge s’allicorda ancora

‘e chilli juorne che ‘o popolo cu te

ha visto ‘o sole splennere pe’ n’ora