Note e Versi Meridiani

'O Prufessore

di Luciano Somma

Poesia letta dall'Autore

(Registrata nella trasmissione “L'uomo della notte”, andata in onda nel 1979 a Radio Mondolibero - Napoli condotta da Gilbert).

Cuono Gaglione, "Il Leggio del Tempo"

'O Prufessore

 

All'angulo d''e scale d''o “Petraro”

cu' nu cappotto tutto spertusato

cu''o bastunciello e cu' nu sguardo amaro

io l'aggio visto, ajere, appuntunato.

'Stu vicchiariello, ca teneva mente,

'a ggente che passava, cumpiaciuto,

m'ha purtato, accussì, 'mpruvvisamente,

a chi vulevo bbene e aggio “temuto”

Teneva 'e spalle larghe 'e nu gurilla,

teneva 'a voce forte 'e nu tenore

quanno traseva in classe cu' nu strillo

tremmavemo dicenno: " 'O Prufessore"!

Quanta ricorde dint''a nu mumento,

vedenno chistu viecchio cu' l'affanno,

e che malincunia a tenerle mente

penzanno a comme so' vulate l'anne.

Cu''o mantesino, 'a borza e 'a marennella,

'e scarpe arrepezzate a meze sole,

me veco miez''all'ati guagliuncielle

quanno, cuntente e allere ievemo a' scola.

'O maestro alluccava: Si na crapa

vaje na schifezza in Storia e Geografia

tu tiene 'a segatura dint' a' capa

nun riesce a 'mpararte na poesia.

Mò ca 'e poesie n'aggio scritto tante

e ssaccio bbona 'a Storia e 'a Geografia,

comme vurria turnà pe' nu mumento

mò n'ata vota nnante a' scrivania.

E nun vedè 'stu viecchio strascenato

all'angulo d''e scale d''o “Petraro”

cu' nu cappotto tutto spertusato

cu''o bastunciello e cu' nu sguardo amaro...

 

Luciano Somma

da Dimane, Ed. Degli Artisti, Napoli 1977

Centro Culturale e di Studi Storici "Brigantino - il Portale del Sud" - Napoli e Palermo admin@ilportaledelsud.org ®copyright 2009: tutti i diritti riservati. Webmaster: Brigantino.

Sito derattizzato e debossizzato