Ce site state maje
Dint’a nu vascio
Sgarrupato e
viecchio
Scavato dint’’e
pprete
Addò l’ummedità
trase ‘int’all’osse?
Ce site state maje
Dint’a nu vascio?
Na tavula tarlata
Cu’ quatto segge
‘e paglia
Na branda militare
N’armadio rusecato
E ‘a famma, tanta
famma,
patuta juorno pe’
ghiuorno,
pe’ quanno po’
durà nu calannario
accuminciata già
quanno se nasce
sofferta a ogne
mumento ‘e stu calvario.
Cristo che campa
Senza cchiù Dio
Stanco d’’a vita
Stanco d’’a morte
Stanco…
Sempe accussì
‘a primma ‘e
Masaniello,
l’unica nuvità
è na televisione
che fa vedè
ricchezze scanusciute
case, cummedità,
magnà, visone…
Ce site state maje
dint’a nu vascio?
Guaglione annure,
femmene ammusciate,
puzze d’ummedità,
tanfo ‘e sudore,
nu pizzico ‘int’’o
core, nu squallore.
Ches’è ancor’ogge
Napule,
‘o mare, ‘o sole’
a vita assaie luntano
E ‘a croce ch’è
pesante
P’’o Cristo senza
Dio Napulitano. |