Villanelle Napulitane

di Luciano Somma

Fujte bonaggè cafune e letterate
fujte mariuncielle e scugnizze 'nnammurate
fujte giuvinotte buone e sfatecate
fujte vicchiarielle 'nziste e scartellate
simme venute cca pe' vennere l'ammore
ve dong'a voce a stesa cacciate 'a capa fora
sta misculanza è doce, overo è cosa fina
fatta cu 'e note sfuse e corde 'e manduline
Fuje 'oi Principe 'a Marchesa
sta zumpanno cu 'o prevete d''a chiesa
'o Burbone è asciuto pazzo
s'è araputo 'o burdello 'ncopp'a chiazza
Sott''o lampadario d''e stelle nuje Cantammo stasera
Pe' tramente siente 'int''all'aria 'o prufumo d''o mare
e recitammole comme uraziune 'e canzone ca fossero amare
comme 'e jastemme 'e 'na vecchia c'aspetta 'o miracule 'e San Gennaro.

Sunanno cu 'e scetavajasse pe' tutt'a notte fino a dimane
cu 'e triccaballacche e chitarre passamme ma senza 'o cappiello 'mmano
Purtammo 'na voce nova pe' storie chiù antiche, d''e tiempe luntane
Cantammo a Napule bella, che fa si nun simme napulitane!
Parlammo d''e viche e d''e vascie d'o cielo e d'o mare D''e stelle e d''a luna
Cuntammo na storia d'ammore ricca 'e passione Ma chiena 'e sfurtuna
'e Pulecenella ca comm'a nu figlio s'appenne 'o pizzo 'a suttana
'e Napule accisa da 'e turche da li sarracine da 'e mericane

'a Piazza d''o Mercato chiena 'e bancarelle
stasera arrassusia nun se pavano gabelle
aglie fravaglie cuorne e cadeno 'e curtielle
fernesce 'a guapparia ccà è turnato Masaniello
'o suono 'e caccavella è comme nu lamiento
e 'o popolo 'e sti vasce me pare stu strumiento
che alleramente assaje all'uocchie s'appresenta
ma 'ncuorpo tene 'o tuosseco e l'anema vullente
Tutto 'o chianto 'e stu paese
nun è acqua so spingule frangese
ca le pogneno 'a bellezza
'mbuttunannola 'e suorece e munnezza
Sotto 'o lampadario d'e stelle nuje cantamme stasera
pe' tramente sienti int'all'aria 'a voce d'e marenare
e recitammole comme uraziune 'e canzone ca fossero amare
comme 'e jastemme 'e 'na vecchia c'aspetta 'o miracule 'e San Gennaro.

Sunanno cu 'e scetavajasse pe' tutt'a notte fino a dimane
cu 'e triccaballacche e chitarre passamme ma senza 'o cappiello 'mmano
Purtammo 'na voce nova pe' storie chiù antiche, d''e tiempe luntane
Cantammo a Napule bella, che fa si nun simme napulitane!
Parlammo d''e viche e d''e vascie d'o cielo e d'o mare d''e stelle e d''a luna
Cuntammo na storia d'ammore ricca 'e passione Ma chiena 'e sfurtuna
'e Pulecenella ca comm'a nu figlio s'appenne 'o pizzo 'a suttana
'e Napule accisa da 'e turche da li sarracine da 'e mericane.