Dimmi, dimmi, apuzza nica, unni vai cussì matinu? Nun c’è cima, chi arrussica, di lu munti a nui vicinu; trema ancora, ancora luci la ruggiada ‘ntra li prati; dun’accura nun ti arruci l’ali d’oru delicati. Li ciuriddi, durmigghiusi ‘ntra li virdi soi buttuni, stannu ancora stritti e chiusi cu li testi a pinnuluni. Ma l’aluzza s’affatica! Ma tu voli e fai caminu. Dimmi, dimmi, apuzza nica, unni vai cussì matinu? Cerchi meli? e s’iddu è chissu, chiudi l’ali e ‘un ti straccari; ti lu ‘nzignu un locu fissu, unni ài sempri chi sucari: lu canusci lu miu amuri, Nici mia di l’occhi beddi? ‘Ntra ddi labbri c’è un sapuri na ducizza chi mai speddi; ‘ntra lu labbru culuritu di lu caru amatu beni c’è lu meli chiù squisitu: suca, sucalu, ca veni. | 
