|
‘A storia ‘e sta città
è antica e vecchia assaje…
Mille e mill’anne fa
mo Greci e mo Sannite
vulettero crià chesta specialità
e fu chiamata Napoli
perla ‘e l’umanità.
Cchiù tarde po’ ‘e Romane
nutanno chistu spanto
stu mare e stu vulcano
venettero a piscà
e ‘a terra cchiù felice
putettero spuglià.
E ‘a tanno chiorme ‘e popule
Germane e Bizantine
Lombarde e Sarracine
scennettero addu nuie
e fu nu piglia e fuie…
Cca ‘nnante ‘o mare ‘e argiento
areto San Martino
e late sta ‘a muntagna
ca spisso fa ‘o mappina
c’o fuoco ca s’a magna
ma po’ t’a fa cchiù ricca
e ognuno arriva e allicca.
E doppo…Aragonese
Normanne cu Francese
Spagnuole ed Austriacante
trasenno a mano a mano
propio pe’ ce aiutà
justo pe ce arrubbà…
E l’urdemo Borbone
in arte Franceschiello
passaie a nu savoiardo
Vittorio Emanuello
aunito a Garibardo
‘o mele ca sta ccà…
E quacche tiempo fa
vulenno sciavecà
pure l’americane
facettero l’indiane
e questa mia città
venettero a sfrunnà.
Ed ogge ce sta chi
dicennese taliano
passa e ce lassa annure
pure si è paisano
facennese chiammà
uomo di qualità.
Che chiante e che fatica
chi lupo e chi furmica
qua freve e qua muneta…
Napule è chella preta
ca luce e dà calore
si ‘a mano c’a accarezza
‘a guarda int’a futezza…
Napule è chella sora
ca resta sempe fora
si ‘o juorno agliummeruto
attenne nu saluto…
Napule è na prumessa
ca resta sempe ‘a stessa
na figlia senza pate
na sora e quacche frate
nu cunto maje fernuto
nu juorno ca è futtuto
na storia p’e giurnale
‘a stessa tale e quale.
Napule nun s’accatta
Napule nun se venne
e si sta chiocca ‘a ‘ntenne
po’ esse ca antrasatta
se sceta sbatte ‘e penne
e se ne vola ‘ncielo
cu Cristo int’o Vangelo.
|
