E’ na tempesta ‘e fuoco lampe e truone
nu viento ca t’afferra e ca te stona
na voce mille voce na ‘nzarrimma
ca cresce e se fa onna…na calimma.
Te piglia chianu chiano stu calore
ca parte ‘a int’a chiocca e regne ‘o core
saglienno comme a l’onne ‘e chistu mare
scennenno dint’o sango e se fa acciaro.
E’ ‘a freve ca te piglia quanno ‘nterra
chist’unnece gagliune fanno ‘a guerra
cu na bannera azzurra comme ‘o cielo
cu tanta arraggia ‘ncuorpo ca è vangelo
luttanno ‘ncoppa’o campo na partita
ca scorre dint’e vene comm’a vita
e quanno ‘a palla sfonna cielo e porta
tu allucche goll e ‘o riesto nun te
‘mporta.
E’ suonno ca se sceta sempe ‘nzisto
è croce ca se ‘nchiova comme a Cristo.
E’ bbene ca nun sape tradimento
na smania ca tu lasse a testamiento
‘a storia cchiù putente ‘e nu giurnale.
E’ pane famme mamma figlio e sale
è sole ca m’appiccia sango e core
passione ca se chiamma primmo ammore.
|