Note e Versi Meridiani

 

 

pagina autore

'O Viecchio

di Peppe Cassese

 

So’ viecchio forse viecchio quant’o munno

so’ nato int’a stu mare d’o sprufunno

e chesta terra allera è robba mia

e chello ca ce cresce è marvasia.

Io faccio ‘o guardiano a sta realtà

ma ogne tanto l’aggio’a smantellà.

 

Nun porto ‘e cunte a l’anne già passate

ne songo troppo e certo me so’ frate

mille e migliare ‘ncopp’a chesti spalle

e n’aggio visto fatte e pure palle:

‘a meglia umanità cca s’è piazzata

pe’ chistu cielo e ‘a stu babà affatata.

 

Greci Romane Arabe e Normanne

se so’ assettate ‘nzino a chesti banne

e appriesso ancora tante e n’ati tante

a se scarfà c’o sole ‘e nu giagante

ca quanno arape ‘a vocca spanne guaje

e tu po’ chiamme ‘e sante ‘e chi già saje.

 

Ma ogge ‘o tiempo s’è cagnata ‘a vesta

e ‘a vita è addeventata na menesta

cu ggente ca mettenno mano ‘a pialla

ha fatto addeventà sta terra stalla

e io ca tengo ‘e vierme dint’a casa

me sento sua eccellenza c’a prevasa.

 

‘E cunte nun’e faccio ma sta certo

ca chesta panza è pronta a fa’ cuncierto

e si t’a sono a core a serenata

tu nun t’a scuorde cchiù chesta cantata

e si me metto a fa’ ‘o gallo ‘nzisto

te porta ‘a meglia merca e ‘o peggio scisto.

 

So’ viecchio assaje mio caro e so’ muntagna

c’o fuoco ca me ‘nzorfa e m’accumpagna

c’a chiocca toia ca sbatte ogne mumento

mente me guarde e triemme pe’ ‘ntramento.

 

So’ viecchio ‘a cchiù ‘e mill’anne scemanfù

e si me sceto cca nun tuorne cchiù.

 

Pubblicazione de ilportaledelsud.org, novembre 2015

Centro Culturale e di Studi Storici "Brigantino - il Portale del Sud" - Napoli e Palermo admin@ilportaledelsud.org ®copyright 2015: tutti i diritti riservati. Webmaster: Brigantino.

Sito derattizzato e debossizzato