|
‘O Mare ‘e Mieze ’e terre
è mare furtunato
è mare c’ha ‘mparato
a l’onne e a ogne tempesta
ca quanno vene ‘a festa
ancora può cantà.
‘O Mare ‘e Mieze ’e terre
è mare assaie salato
ca troppo ha suppurtato
facenno ‘o ciuccio e ‘o pinto
ma tu cercanno ainto
ancora può truvà.
‘O Mare ‘e Mieze ’e terre
è mare c’ha studiato
‘a vita e comme è stato
ca attenne tutto e niente
pecchè strignenno ‘e diente
tu ancora può arrivà.
‘O Mare ‘e Mieze ’e terre
è mare disgraziato
ca scagna ‘o semmenato
cu quatto pataterne
pecchè sunnanno ‘o terno
tu ancora ‘e può appiccià.
‘O Mare ‘e Mieze ’e terre
è mare accatarrato
ca nun vò fa’ ‘o malato
e stipa int'a valanza
chell’urdema speranza
ca ancora può scrià.
‘O mare ‘e Miez’e terre
è mare scellerato
ca ‘o core s’è magnato
c‘a faccia ‘e sti criature
‘nchiudenno ‘e tirature
e ‘o munno sta a guardà.
|
