|
Songo partuto figlio 'e na
speranza,
pe dà na terra nova a chesta
famma
ca cresce e more senza avè na
mamma,
frate 'e nu tiempo perzo int’a
valanza.
Songo partuto e steve miezo a
tante,
'nfurchiate comme a puorche e
pecurune;
gente a migliare ed eramo
nisciuno...
Sulo 'a fetumma era nu giagante!
Songo partuto e comme so'
arrivato
nu viecchio m'afferrato e ha
ditto: " Llà!
Chella è l'Ammereca, chella è 'a
Libertà...!"
e 'o pietto s'è 'nfucato e s'è
‘ncurdato.
L'Ammereca, che terra consacrata!
Terra ca conta mille si daie
mille,
terra ca nun se perde c'a
diasilla,
chiena 'e salute, chiena 'e dio
lodato...
Terra c'aggio stentato e aggio
spaccato,
scavanno case, sciumme, prete e
mare,
cu chesti bracce addeventate
acciaro...
Terra ca gente antica ha vasulato!
L'Ammereca, na corza ‘nfaccia 'o
viento,
cu dinto sango e carne smancecata,
cu fora juorne e notte
spetacciate.
L'Ammereca, che granne
smazzamiento!
L'Ammereca songo io, nu poco 'e
niente,
ca 'a sciorta s'è pigliato e s'è
purtato
addò pure nu santo ha 'nciampecato...
L'Ammereca, guagliù, è chesta
gente!
Gente c'a dato 'a vita, 'o nomme
e 'o core,
gente ca tu cuffiave pezze-a-culo,
gente ca tu sapive quartarulo,
gente ca cu sti mane ha scritto
'a STORIA!
|
