Note e Versi Meridiani

E’ na canzona ca nun tene sciato

pecché chi ‘a canta è nato già scurdato…

E’ na canzona ca nun tene mamma

pecché è crisciuta justo int’a quartamma…

E’ na canzona ca dimane more

pecché già sape ca nun tene core.

Se sente miez’e strade ‘e chesta vita

‘ncopp’a nu banco scritta c’a matita

e parla d’a paura ‘e nu nennillo

ca chiagne assaje  nun poco pucurillo

pecché ‘a cumpagna stesa int’a nu lietto

pe’ na freva nun trova cchiù arricietto.

E sona canta e sona c’a speranza

ca ‘o male se ne fuje ‘a chella stanza…

E canta sona e canta c’a passione

‘e chi addeventa pecora lione

pe’ scarpisà stu viento malamente

ca scioscia dint’o sango e fa ‘o fetente.

E’ na canzona ca se chiamma ammore

pecché vulesse scancellà ‘o dulore…

E’ na canzona ca se sente annura

pecché se trova sola ‘nfaccio ‘o muro…

E’ na canzona ca nun serve a niente

pecché nun sceta tutta chesta gente!

Pubblicazione de ilportaledelsud.org, febbraio 2015