Note e Versi Meridiani

Vulesse nu Natale

e no uno normale

ma uno assaje speciale

tutto particolare

addò na mana stesa

fosse nu raggio ‘e sole

addò nu vaso doce

carmasse nu delore

addò nu tanti auguri

valesse ciento core.

Vulesse nu Natale

e no uno banale

ma uno eccezionale

‘mpanuto e senza scale

addò nu vraccio muzzo

facesse ‘o natatore

addò na scarpa rotta

pigliasse ‘a scurciatora

addò nu muorto ‘e famme

putesse fa’ ‘o signore.

Vulesse nu Natale

e no n’elettorale

ma uno origginale

miso ‘ncoppa ‘o giurnale

addò duie uocchie ‘mmatule

parlassero d’ammore

addò nu figlio perzo

nun fosse ‘mpustatore

addò na mamma afflitta

cantasse a scialacore.

Vulesse nu Natale

e no uno formale

ma uno magistrale

tutto fenomenale

addò nu pianefforte

sunasse ‘a ‘ncantatore

addò na malalengua

nun fosse apprettatora

addò sta penna storta

facesse ‘o cusetore

e te mettesse aunite

‘o justo e ‘o peccatore.

Pubblicazione de ilportaledelsud.org, dicembre 2014