Note e Versi Meridiani

" 'E sorde songo 'a meglia cumpagnia...

songo 'o chiavino c'arape tutte 'e porte!"

scramaje 'o cchiù riccone 'nnante 'a morte,

credennese 'e puterla 'ntravuglià

cu na montagna ‘e sorde a fa schiattà.

'A morte se facette na risata

e cu na voce arza  ma 'ntunata

'o rispunnette propio 'a galantommo:

" Pe' sorde t'è scurdato ca si ommo,

'a dignità l'he miso int'e cazette...

Pe' sorde tu sì stato na ninette!

T'abbuffato, t'a dato e t'a vennuto

e a faccia 'e l'ate tu te si regnuto...

Cu 'e sorde t'agguazzato tutta 'a vita

ma 'a sottoscritta nun t'a può accattà!

Io porto 'e cunte e so' na brutta zita...

Songo cecata, sorda e 'nchiavecona...

Io 'nchiudo ‘e porte e arapo uno purtone,

e comme trase ccà te faie cravone!

Ahi voglia 'e trasfurmà chelle ca tuocche...

Sarrà pur'oro ma appiso a chiste cruocche

ce truove 'a meglia gente ca int'a niente

comme m'a vaso torna a fa 'a pezzente!"

Pubblicazione de ilportaledelsud.org, ottobre 2014