Note e Versi Meridiani

 

 

pagina autore

Rivoluzione...Rivoluzione

e Nu '48

poesie di Peppe Cassese

 

Rivoluzione...Rivoluzione

 

Rivoluzione, rivoluzione,

ogge ‘o popolo è scurzone!

Rivoluzione, rivoluzione,

nun vulimmo cchiù patrone!

Rivoluzione, rivoluzione,

chisto è ‘o juorno d’o fucone

ca t’appiccia mare e terra,

ca te joca ‘o serra-serra

pecchè è stanco ‘e sfrennesià

e se sente ‘e sbattaglià.

Chesta è l’ora d’o fracasso,

chesta è l’ora ca ce ‘ngrassa!

Simmo ‘o popolo tiranno

e spannite a tutte ‘o banno!

 

Rivoluzione, rivoluzione,

ogge ‘o popolo è lione!

Rivoluzione,rivoluzione,

nun vò sentere raggione!

Rivoluzione, rivoluzione,

votte ‘e mane e fa ‘o schiantone,

bive e magne ‘a chi t’avuto

e appreparece ‘o tauto

pecchè è tiempo ‘e cagna ‘a vesta,

e sunà pe’ n’ata festa.

Chesta è gente bannariola...

chesta è gente mariola!

Simmo ‘o popolo vullente

ca stu juorno scogna ardente!

 

Rivoluzione, rivoluzione,

ogge ‘o popolo è vurpone!

Rivoluzione, rivoluzione,

lanza ‘e prete e fa ‘o scignone!

Rivoluzione, rivoluzione,

s’è ‘ngrifato ‘o capaglione

e cu tutta quanta ‘a freva

va currenno a quaglià ‘a neva,

pecchè a ‘ntiso ca ‘a parrocchia

sta apparanno na papocchia.

Chesta è gente ca fa ‘a croce...

chesta è gente doce doce!

Simmo ‘o popolo mappina

ca, cchiù sbatte, cchiù strascina!

 

Rivoluzione, rivoluzione,

ogge ‘o popolo è bestione!

Rivoluzione, rivoluzione,

s’è scetato e fa ‘o pappone!

Rivoluzione, rivoluzione,

s’è ‘nfucato ‘o cannarone

pe’ sta vita, sta lutamma,

ca s’a perzo pure ‘a ‘a mamma,

pecchè ‘a capa s’è ‘ntrucchiato

e se ‘nfizza int’o pignato.

Chesta è gente ca nun schiatta...

chesta è gente ca fa ‘a ratta!

Simmo ‘o popolo furtezza

tutto l’ate so’ munnezza!

 

Nu '48

 

Nu '48 pe resciatà,

nu '48 pe ce sfucà,

nu '48 pe chesta famma,

ca cerca terra,

ca è senza mamma,

c'abbruscia 'e ammore,

ca è strappacore,

pecchè just'ogge nun vo vedè

pappune e schiave pezziente e rè.

 

Nu '48 pe me e pe te,

nu '48 ca ddoie fa tre,

nu '48 p'a gente nosta,

ca conta l'ore,

ca vò culore,

russo c'o verde,

c'o verde 'o ghianco,

pecchè stu tiempo fa 'o magnafranco,

pecchè stu cielo se sente stanco.

 

Nu '48 pe fà e pe dà,

nu '48 ca vo 'mparà,

nu '48 ca allucca BASTA,

ca vo jettà sta vecchia crasta,

ca guarda 'nnanze,

ca denchie 'a panza,

pecchè chi chiagne se spogne 'e mane,

pecchè chi sfragne te fà 'o cristiano.

 

Nu '48 p'a 'nfamità,

nu '48 p'a scancellà,

nu '48 pe na bannera

ca chistu juorno fa doce e allero,

ca tene sciato,

ca a già 'mparato,

pecchè stu munno vulimmo tunno

pecchè io zappo e tu sulo munne.

 

Nu '48 pe n'ata storia,

nu '48 p'a pappatoria,

nu '48 ca canta 'a vita,

ca va scrivenno tutto esaurito,

ca attacca e stregne,

ca schiova e tegne,

pecchè si stanco d'a lista a lutto,

pecchè a sta sotto te siente strutto.

 

Nu '48 p'a sciorta toia,

nu '48 pe chi fa 'o boia,

nu '48 ca appiccia e stuta,

ca cu sciurdezza spogna e saluta,

ca vo p'avè,

ca vo tenè,

pecchè sta vota vo cumannà

pecchè pe sempe vo 'a libertà.

 

Pubblicazione de ilportaledelsud.org, aprile 2014

Centro Culturale e di Studi Storici "Brigantino - il Portale del Sud" - Napoli e Palermo admin@ilportaledelsud.org ®copyright 2014: tutti i diritti riservati. Webmaster: Brigantino.

Sito derattizzato e debossizzato