Note e Versi Meridiani

 

 

pagina autore

E chiove

di Peppe Cassese

 

E chiove

 

E chiove sotto 'o cielo

e chiove e scenne 'o gelo.

e chiove 'ncopp'a via

e chesta è ‘a strata mia.

 

E chiove pe stunà

e 'o tiempo sta a scuccià.

 

E chiove ‘nfaccia ‘a ggente

e chiove ‘ncoppa ‘o niente

e chiove a sbotamiento

e chiove a schiattamiento…

 

E chiove pe’ abbelì

pe ce fa ‘nfucetì…

 

E chiove dint’a sacca

e a me me vene ‘a fiacca

e chiove a vienetenne

e ‘a panza sagli e scenne…

 

E chiove pe’ tricà

pe’ pognere e sbià…

 

E chiove comme a che

ma tu che vuole 'a me?

E chiove pe ‘ntramente

e ‘o sole fa ‘o pezzente

 

E chiove a dì gnornò

e ‘a coscia fa sciò sciò.

 

E chiove pe scummessa

e 'a vita è sempe 'a stessa:

'o strunzo saglie a galla

e a me s'ammoscia 'a palla.

 

E chiove senza sì

e io cerco ‘e scumparì.

 

E chiove int'o stipone

e nun me sento bbuono

e chiove 'ncopp'a carta

e 'a penna nun me parte.

 

E chiove pe stunà

e ‘a chiocca vò sfratttà.

 

E chiove a stammatina

e ‘a vocca se strascina

e chiove appriesso appriesso

e ‘o tiempo è sempe ‘o stesso.

 

E chiove addo saie tu

e  nun ci’a faccio cchiù…

 

E chiove sotto ‘o core

e chiove a tutte l’ore

e parlo e cchiù m’allento

te chiammo e nun te sento…

 

E chiove e  songo sulo

e chiove…v’a fa ‘nculo!

 

Pubblicazione de ilportaledelsud.org, febbraio 2014

Centro Culturale e di Studi Storici "Brigantino - il Portale del Sud" - Napoli e Palermo admin@ilportaledelsud.org ®copyright 2014: tutti i diritti riservati. Webmaster: Brigantino.

Sito derattizzato e debossizzato